同細路仔《打擂台》

事情是咁的。我公司的義工隊久不久帶觧魚行學校的細路去街，衝出大角咀深水埗，增廣見聞。

2010-11學年最後的一次活動本來定於六月初，想帶他們過海、坐電車、行維園（好明顯別有用心）、入戲院。入戲院固然本身是一種新鮮的經驗，我也很想一箭雙雕地帶他們看一齣好電影。一直又以為／希冀《打擂台》會再浩浩蕩蕩地公映，點知無。而我們的日期亦多番拖延至七月初。

於是我們打算租同事大黑的 clubhouse 的私人影院看《打擂台》。誰知活動前幾天才得知這次參加的同學由小三至五不等，即時冒汗。恐怕他們有些不欣賞的話，就會毫不畀面地走來走去撩人講嘢搞搞震最終看不成戲瀨晒嘢。於是心想，不如開隻 Toy Story 3 罷了。反正 Toy Story 3 又好睇意識又正面又是卡通片。

但我不想當他們是細路仔（一定要看卡通片），而且，Toy Story 3 成屋玩具那種很中產的背景未免跟他們的處境很有距離。而我相信，我們小時候也看不少大人戲或大人書，不完全明白也可以喜歡，應該 OK 的。別放一齣 Kieslowski 就好。反正鮮魚行的細路比同齡兒童成熟，加上由於不少是新移民，其實會比外邊同級兒童還大一點。

於是想了幾天，決定搏一搏，我要他們看一齣優秀的港產片、一齣香港電影金像獎得獎影片，要他們歡樂，也要他們感染到戲裡戲外「要打，就一定要贏」的鬥志。

首先，多謝「碧海藍天」的私人影院座位剛剛夠，而且完全黑媽媽，音效也不賴，除了不用憑票入場和沒有爆谷可樂和其他觀眾，真是完全戲院 feel。

班細路真係估佢唔到咁掂！

一開場，就完全被吸咗入去，基本上係粒聲唔出，又或者乜都笑一餐，包括由於有位師兄叫陳飛揚，他們一見到劇中的飛揚就笑都停唔到，好過癮。偶爾有比較難明的，例如師傅張床空了代表死了，會有人口翕翕問，又會有人口翕翕答。唯一沒甚反應的是夜總會一幕，沒反應也是好事。他們也觀察入微，記得蠟鴨係由冰鮮雞「飾演」，又記得個「勁」字出現過在很多地方，包括「涼瓜排骨飯」隔籬！

看完了戲，有粒好細粒的細路有啲唔好意思細細聲咁問：「點解佢地最後喺度笑嘅？」小妹妹問了最重要的問題，好有慧根呀！

然後我的嘉賓豬滴滴姐姐帶啲細路討論了一會，問他們阿淳係贏定輸，有一粒大粒啲嘅細路好堅定咁企係度話：「贏。因為佢盡咗力，冇辜負到師父嘅期望。」我差點就流淚了！

十分滿分的話，我們做了個民調，細路平均畀 8.5 分。個別特別興奮的，說今個學年最喜歡今次的活動。

然後我也補充了一些幕後花絮，例如 MC Jin 不會讀中文但一早背熟和練好了自己和對手的稿，入場不用拿劇本，那份努力和珍惜機會做到最好的精神很值得我們學習。

我：「師傅話邊度係擂台呀？」
細路：「邊度都係擂台！」

細路，你地記得師傅話邊度都係擂台。你地人生都有好多擂台，啱啱過咗一個大考，未來仲有好多關。記住，我地要打，一定要贏！

節目完。

反高潮的是，我後來問老師和其他義工同事覺得怎樣。老師說 OK 我便放心了，因為知道劇中有粗口，學校未必受；至於同事，有些很欣賞。唯獨一個，他雙眼向上翻了 45 度說：「我唔睇港產片嘅！」我想串佢同𢱕佢。不過算罷了，費時嘥氣。